2Cor 2 | KYG | STEP | Nagaemo, apaipamo'mo kana hisiyafe'mo halate o'uguve, hu'na naipafi'mo ago nagesamo afi'nove.

2 Corinthians 2

1 Nagaemo, apaipamo'mo kana hisiyafe'mo halate o'uguve, hu'na naipafi'mo ago nagesamo afi'nove. 2 Nagaemo lapaipamo'mo kana hisiya ya'mo ali'na lapamisugeno'ae'mo nagaemo namogaga aisuva ya'mo ina lagimo ali'a namisaya vaya'mo maigae, lapaipamo'mo kana hugiya'mofe'mae.

3 Visugetapae'mo namogaga aisuva ya'mo alita namisaya vaya'mogitapamo naipamo'mo kana hisiya ya'mo alita o'namisayafe'mo o'u'na avoke'mo kae'nove. Lole nagesamo o'afi'na lokiya vai'na magoke nagesamo afi'nae'mo, namogaga aisuvana ani kava hutapa lapamogaga aigae. 4 Naipamo'mo kana huteno nainagamo fai'nigeno naunumo nelamige'na mani avo'mo kae'nove. Lapaipamo'mo kana hisiyafe'mo mani avo'mo okae'nova'monanafa lapakaefe'mo lusi kava huno nahau nayamopafi'mo nahau'niya kava'nimo agesayafe'mo avo'mo kae'nove.

Hosu kava'mo hu'niya vekae'mo, ato, hutapa ha paiyo, huno hapa pai'niya gemae

5 Mago vaya'amo apaipamo'mo kana hu'niya ya'mo alino apami'niya vekamo'a nagaetegamo osu'niyana lapakaetegamo hu'niye. Aigofe gemo osisuvafe'mo muki'amogitapa ani kanamo ali'nae, hu'na osu'nofa mago'amogitapamo ani kanamo ali'nae, hu'na hu'nove. 6 Asole vaya'amogitapamo hosu kava'alefe'mo anona'amo ami'naya kava'mo alagi'mo ami'nae. 7 Fiku yanageno aipamo'mo lusi kava huno kana hisigeno atalegaiyanagi hosu kava'amo alita ataletetapa alita lokiya vaitapa ateyo. 8 Lapakaemo muki vaya'ai apaulagale'mo agaefe'mo lapau lapayamopafi'mo lapau'niya kavatapimo alitapa ave liyo. 9 Hogote'na muki ge'animo afitetapa akame hisafi, hu'na lapamalageka hisuvafe'mo mago avo'mo kae'nove. 10 Lapakaemo hosu kava'amo alitapa atalesage'nae'mo nagae'e'mo ali'na atalegauve. Nagaetegamo hosu kava'mo hu'nisiya'mo'mo ali'na atale'nove. Lapa maesuvafe'mo Kalaisi aulagale'mo hosu kava'amo ali'na atale'nove. 11 Fiku yanageno Satani'a humi lateteno aeno lagasegaiye. Na agufa kava'mo alino afole aino atesiyafe'mo hau'nifi huta age'none.

Polo'a Toloasi taonifi'mo mai'nigeno'ae'mo aipamo'mo kana huno mai'niya gemae

12 Nagaemo Kalaisife'mo alagepa faigoko ge'amo ae'na hakalo hu'na hapa paisuvafe'mo Toloasi taonifi'mo u'na ava'yi hu'nogeno'ae'mo Ala kava ne'mo'a ali'ya'amo alisuvafe'mo ka'mo valino nate'niye. 13 Nagaemo konaga'nimo'mo Taitasi'a kahauya hu'na age'na ava ote'nova'mofe'mo nahausoli hu'nige'nae'mo maitaleyo, hu'na hute'na apatale'na Masetoniya kotegamo u'nove. 14 Vae, Gotife'mo hao ke he'nove. Goti'a muki afina'mo alagepa huno laha ne'maegeta Kalaisipi'mo mai'netae'mo kame vayatimo aeta apakaseta ne'une. Ne'unageno'ae'mo Kalaisife'mo ava gemo afi'a aeto hisaya faigoko ge'amo alagepa atu aigekana huno muki kotegamo aino atagu faenuneno nehiye. 15 Lagaemo utae'mo apakufamo alino katino ne'apateya vaya'aitega'e alino apago'ya lagauno apatalesiya kate'mo ne'vaya vaya'aitega'e'mo Kalaisife'mo alagepa faigoko ge'amo aeta hakalo huta hapa nepaunageno'ae'mo Kalaisi'a alagepa atumo ne'aigeno'ae'mo Goti'a atu'amo ne'afiye. 16 Lagaemo alino apago'ya lagauno apatalesiya vaya'aitefe'mo fali'naya vaya'mogi hosu atu aigekana huta mai'nonage'apae'mo atu'amo ne'afiyanage'a faligae. Lagaemo apakufamo alino katino ne'apateya vaya'aitefe'mo afa'a maisaya ya'mo alino ne'apamiya ya'mo atu aigekana huta mai'nonage'apae'mo atu'amo ne'afiyanage'a maige maige hu'a maigae. Ina lagimo ani kana hu'niya ali'ya'mo afa'a aligae. 17 Asole tisa vayatapimogimo umenitata hu'a kagemi ya'apimo maketi nehaya vayakana hu'a Goti ge'amo ae'a hakalo hu'a hapa nepaiya'monanafa lagaemo Kalaisipi'mo mai'netae'mo Goti'a lami'niya ali'ya'amo ne'alitae'mo Goti aulagale'mo laipafati'mo aeta hakalo huta hapa nepaune.